Solfestivalen 2026

Velkomne til SOLfestivalen i Skjåk 2.–8. mars 2026

Målet er å helse sola attende og samtidig feire mykje av det fine vi har i Skjåk. Vi inviterer dykk til å bli med på feiringa, der næringsliv, lag og foreiningar kan syne seg fram og bidra til å skape ei minnerik oppleving og eit fellesskap i sola sitt teikn.

Her er programmet pr, 20/1-26. Hugs å melde frå om du har noko som kan vere med. Programmet blir oppdatert kontinuerleg her på nettsida. Frist for å få bli med i papirprogrammet er 31/1-26. 

Valkyrien Allstars kjem til SOLfestivalen i Skjåk

 

Valkyrien Allstars

 

Marlo Grendehus i Skjåk laurdag 7. mars kl 19

Valkyrien Allstars har gått i nye retningar for kvar utgjeving, og blir rekna som pionerar innan den nye folkemusikken med sitt heilt eigne særpreg.
Bandet består av Tuva Syvertsen, Magnus Larsen Jr., Erik Sollid og Martin Langlie.

Saman lagar og arrangerer dei låtar som handlar om evig kjærleik og mysterium som aldri blir løyste. Både på plate og live byr dei på energi, inderlegdom og overraskande vendingar.

Vi opnar dørene kl 18, konserten byrjar kl 19.

Arr: Vennelaget Jan-Magnus Bruheim, Jakupscena, Skjåk folkebibliotek, Skjåk kommune - kultur med støtte frå Innlandet fylkeskommune

Billettar kjøper du på Tikkio.com

Are Kalvø kjem til SOLfestivalen i Skjåk

Are Kalvø kjem til SOLfestivalen i Skjåk

 

Marlo Grendehus i Skjåk fredag 6. mars kl 19

Are Kalvø er ein anerkjend norsk satirikar, forfattar og radioprofil som har sett tydelege spor etter seg i norsk humor og samfunnsdebatt. Han er særleg kjend for arbeidet sitt i NRK-radioen.

Frå 1993 til 2009 var Kalvø programleiar for Hallo i uken på NRK P2, eit populært satireprogram som med humor og skarpsyn tok for seg aktuelle hendingar og samfunnsspørsmål. Tidlegare hadde han òg vore programleiar i Nattradioen på NRK P1.

Kalvø har òg hatt stor suksess på scenen, mellom anna med soloframsyninga Berre bønder lengtar heim – ei personleg og humoristisk forteljing om forsøket på å byggje bru mellom by og land, og om å finne ut kva som eigentleg er best av dei to.

Billettar kjøper du på Tikkio.com

Fuglar i fokus på biblioteket

Lavskrike Lars Kurt Haugen

Perlevenner og fuglevenner

I 2026 skal Skjåk folkebibliotek ha ekstra fokus på fuglar. Under SOLfestivalen 2026 skal vi m.a. opne “Fuglebiblioteket”. Vi har kjøpt inn fleire fuglebøker og vi har skaffa eit stort fuglehus som skal stå utanfor Frøbiblioteket vårt. Rune og Jarleif har sagt ja til å ha fuglekassesnikkering og vi skal sette fram eit bord med perler. Her du kan perle ein fugl og kanskje får du ein “perlevenn” også. Vi skal også opne ei fotoutstilling med fine bilete av fuglar, her samarbeider vi med Lars Kurt Haugen og Gaute Meli. 

Kom gjerne med tips og idear til fuglesatsinga vår!

SOLfestivalen er organisert av Skjåk folkebibliotek og Skjåk kommune - kultur.

• Kontakt oss
  Vi ser fram til å feire sola saman med dykk alle.  Ta gjerne kontakt for meir informasjon eller om du har noko som kan vere med i programmet.
  
  Marianne Stensgård: marianne.stensgard@skjaak.kommune.no
  eller
  Sigrun Eide: sigrun.eide@skjaak.kommune.no