Hausten 2021 imponerte Bjørn Tomren heile Noreg som den mest særeigne artisten i den populære NRK-serien «Stjernekamp». Med sitt unike uttrykk og si eineståande formidlingsevne rakk Tomren på kort tid å bli folkekjær, og vart omtalt som «den kuleste artisten i Stjernekamp gjennom tidene». Bjørn følgde opp tv-suksessen med ein lang turné og utselde konsertsalar over heile landet, som kulminerte i tre fullstappa konsertar i Oslo Konserthus.

Artisten, låtskrivaren og komikaren frå Tomrefjorden er også kjent frå den notoriske jodle- og trekkspelduoen Polkabjørn & Kleine Heine, som mellom anna har varma opp for a-ha og blitt stjerner i dokumentarfilmen om seg sjølv, «Kunsten å jodle». I 2019 gav Bjørn ut sitt første album, «Bad Science Fiction», til overveldande kritikkar. Avisa Bergens Tidende karakteriserte plata som «så mørk at ein kan drukne i ho». Tomren sjølv kallar det dystopisk sci-fi-country som ein kan lytte til i bakrus.

Som ein av landets mest allsidige musikarar spenner Tomrens musikalske rekkevidde frå americana og religiøse folketonar til jazz, viser, jodling, strupesong, dialekt-punk og psykedelisk protestmusikk.

Bjørn Tomren har også gjennomført fleire ekspedisjonar og har verdsrekorden i flest kryssingar av Noreg på langs; i kajakk, til fots, på ski og i robåt.

Han kan også sjå tilbake på ein kort karriere som klovn. Eller som forfattaren Erlend Loe seier det:
«Bjørn Tomren er ikkje berre ein gudbenåda musikar med fantastisk stemme. Han kan også sykle på eitt hjul».

Stjernekamp er ikkje den første konkurransen der Tomren gjer seg bemerka. I 2017 deltok han i verdsmeisterskapen i strupesong i Tuva, og tok heim ein bronsehest.