Reguleringsplan for Breheimen AS – gnr./ bnr 49/10 mfl. (Breidskridu)
Planområdet har ein storleik på om lag 32 daa og er hovudsakleg avgrensa til eigedomane Breiskriden gard, gnr./bnr. 49/10 og 20. Planavgrensinga er trekt slik at det òg omfattar mindre delar av naboeigedomar der dette er naudsynt av planfaglege og tryggleiksmessige omsyn, mellom anna knytt til tilkomst og trafikksikkerheit. Ei slik avgrensing er i tråd med vanleg planpraksis og bidreg til ein open og oversiktleg planprosess, som legg til rette for ei samla vurdering av verknadene av tiltaket.
I gjeldande kommuneplan for Skjåk kommune, vedteken 24.06.2021, er planområdet avsett til LNFR-føremål (landbruk, natur, friluftsliv og reindrift), med høve til gardstilknytt næringsverksemd basert på garden sitt ressursgrunnlag. Planområdet omfattar også ein mindre del av fv. 2648 Lundavegen, med formål samferdselsanlegg og teknisk infrastruktur.
Planområdet er ikkje tidlegare regulert.
Føremålet med planarbeidet er å utarbeide ein detaljreguleringsplan som kan leggje til rette for vidareutvikling av eksisterande og ny verksemd på eigedomane, samstundes som ein sikrar langsiktig, føreseieleg og berekraftig drift av gardsbruket. Planarbeidet skal bidra til ei heilskapleg utvikling av området, der eksisterande bygningar, landskap, landbruksinteresser og næringsverksemd vert sett i samanheng.
Forslagsstillar har vurdert om planforslaget utløyser plikt til konsekvensutgreiing i samsvar med forskrift om konsekvensutgreiingar (KU-forskrifta). Vurderinga er gjennomført med utgangspunkt i forskrifta sine krav, og nærare dokumentasjon for vurderinga er oversend Skjåk kommune som eige dokument i samband med oppstartsmøtet. Notat om vurdering av KU-plikt finn ein som eige vedlegg.
På bakgrunn av denne vurderinga er det førebels konkludert med at planforslaget ikkje utløyser krav om konsekvensutgreiing.
Vedlegg
Eventuelle innspel kan sendast skriftleg på følgjande måtar:
- Per e-post til em@nordplan.no
- Skriftleg til: Nordplan AS, Vågåvegen 35, 2680 Vågå.
Frist for å kome med innspel er sett til 15.06.2026.